രൂപാന്തരം 

അങ്ങനെ വീണ്ടും കനത്തു പെയ്യുമ്പോൾ
ഞാൻ ഓടി നിന്നിലേക്കിറങ്ങുന്നു
നീയായി മാറാം എന്ന മോഹത്തോടെ
തണുപ്പ് ചോരയിലേക്ക് പടരുന്ന പോലെയും
വെള്ളം മാംസമായി  മാറുന്ന പോലെയും
ശബ്ദം അസ്ഥികളായി രൂപപ്പെടും പോലെയും
രൂപാന്തരമെന്ന പ്രക്രിയ ഞാൻ അനുഭവിക്കുന്നു
ഉത്തേജിപ്പിച്ചു കൊണ്ടേയിരിക്കുന്ന പ്രക്രിയ
 അതിന്റെ മൂർദ്ധന്യത്തിൽ
 മെല്ലെ ശാന്തത കടന്നു വരുന്നു
പാടിത്തീരുന്ന പാട്ടു പോലെ
മെല്ലെ കടന്നു വരുന്ന നിശ്ശബ്ദതക്കൊടുവിൽ
മഴയായി  തീർന്ന എന്നെ കാണാൻ
കൗതുകത്തോടെ ഞാൻ കണ്ണുകൾ തുറക്കുന്നു
നഞ്ഞൊട്ടിയ കുപ്പായം നോക്കവേ
ഇടിമിന്നലിന്റെ ശബ്ദത്തിൽ നീയെന്നോട് പറയുന്നു
തത്വമസി എന്ന്