കണ്ടെത്തലുകൾ

പറയണമെന്നും

കേൾക്കണമെന്നുമുള്ള നിൻ്റെ വാശി

കേൾവിയും പറച്ചിലും എൻ്റെ മതിലുകൾ തകർക്കുമെന്ന പേടി

എന്നിട്ടും സംഭവിച്ച പറച്ചിലുകൾ കേൾവികൾ

നിന്നെയും നിനക്കും അറിയാമെന്ന വിശ്വാസം

ഒരുപതിറ്റാണ്ടിൻ്റെയിപ്പുറത്തും

ഇതിനെയാണ് ഞാൻ

പ്രണയമെന്നടയാളപ്പെടുത്തുന്നത് .

വെളിച്ചം

ഇവിടെ മുഴുവൻ വെളിച്ചമാണ്

കറുത്ത തിരശ്ശീലയായി അഹം. 

ഞാൻ അനുവദിക്കുമ്പോൾ 

വെളിച്ചം എന്നിലേക്ക് പടരുന്നു

ചുറ്റും സുഗന്ധം പരക്കുന്നു 

ഞാൻ ചിരിക്കുന്നു

നീലയും വെള്ളയും നിറങ്ങൾ

നീല അഗാധമായ ചിന്തയാണ്

വെള്ള തെളിച്ചമുള്ള ചിന്തയാണ് 

നീലയിൽ നിന്ന് വെള്ളയിലേക്കും

വെള്ളയിൽ നിന്ന് നീലയിലേക്കും

വൃത്തത്തിലുള്ള യാത്രയാണ്

നീല തന്നെയാണ് വെള്ള എന്നറിയും വരെ

റോസാപ്പൂക്കൾ തുന്നിപ്പിടിപ്പിച്ച കുപ്പായം

  

പൂക്കൾ ചുവന്നതായിരുന്നു

കുഞ്ഞു കുഞ്ഞുപൂക്കൾ ചിതറികിടക്കുകയായിരുന്നു

ചുവപ്പിൻ്റെ തിളക്കത്തിൽ

മൂർച്ചയുള്ള മുള്ളുകൾ മറഞ്ഞിരുന്നു

പൂക്കളെ എത്തിനോക്കുമ്പോൾ

മുള്ളുകൾ മാന്ത്രികശക്തിയാർജിച്ച് വളർന്നു

നോട്ടം തൊടുത്ത കണ്ണുകൾ വരെ വളർന്നു

കണ്ണിൽ പോറലുണ്ടായി ചോര പൊടിഞ്ഞു

റോസാപ്പൂക്കളുടെ അതേ നിറത്തിൽ

മെറ്റമോർഫോസിസ്

 ഒറ്റക്കുള്ളപ്പോളുള്ള വെളിപാടുകൾ

പരിചിതമാണ്

മറ്റൊരാളുടെ ഇടപെടലിലൂടെയുള്ള

വെളിപാട് പുതുതാണ്

അതിന് തെളിച്ചം കൂടുതലാണ്

അതിന് നോവിപ്പിക്കാനാവുന്ന മൂർച്ചയുണ്ട്

അതിൻ്റെ നരച്ച നിറങ്ങളിലും ചന്തമുണ്ട്

അത് എന്നെത്തന്നെ 

അറിയലാണെന്ന വെളിപാടിനൊപ്പം

 ഉള്ളിൽ കടപ്പാട് നിറയുന്നു

നിർവചനങ്ങൾ

 നിർവചനങ്ങളുടെ മാറ്റങ്ങൾ

നമ്മെ നിർവചിക്കുമ്പോൾ

കൂട്ടെന്നാൽ ഒപ്പമുണ്ടാവൽ മാത്രമല്ല

വളരാൻ സഹായിക്കലാണ് 

വളരുകയെന്നാൽ

അറിയുകയെന്നാണ്

അറിയേണ്ടത് തന്നെത്തന്നെയാണ് 

താൻ എന്നാൽ 

നീയും നിങ്ങളും കൂടിയാണ്

ഒന്നും ഒരിക്കലും തീരുന്നില്ല

നിർവചനങ്ങളുടെ മാറ്റങ്ങളും...

Destiny

 When the dosa batter is perfect 

When t test is significant 

When it's just the follow up sessions 

When you just missed the train 

When signal stays red for long

When there is only cold tea

When the day is slow 

When adavita unravel inside

All that felt was love...

Love and love only 

That's where the destiny is

ഉള്ളറിയുന്ന ജോലി

ഉള്ളറിയുമെന്നും

നോവ് കാണുമെന്നും

കനവ് കേൾക്കുമെന്നും

അറിഞ്ഞു തന്നെയാണ് തുടങ്ങിയത്

മറ്റൊരാളുടെ പ്രണയത്തിൻ്റെ ഉള്ളറിയുമ്പോൾ

എനിക്കും നോവുമെന്നറിഞ്ഞില്ല

അവർ പറഞ്ഞിറങ്ങി പോയശേഷം

ഞാൻ നീറുമെന്നോർത്തില്ല

എല്ലാം അറിഞ്ഞിട്ടും 

താങ്ങായിട്ടും തലോടലായിട്ടും

ഒപ്പമുണ്ടായിട്ടും

ഞാൻ അവരുടെ 

പ്രിയപ്പെട്ട ആരുമല്ല

ഇത് ഉള്ളറിയുന്ന 

ജോലി മാത്രമാണ്

CC TV

 ഞങ്ങൾ ചിരിച്ചത്

പിണങ്ങിയത്

കണ്ണുതുടച്ചത്

മയങ്ങിയത്

മടുത്തു പോയത്

പേടിച്ചത്

എല്ലാം അയാൾ കണ്ടു

എന്നാൽ 

ചിരിച്ചത് പേടിച്ചിട്ടാണെന്നും

പിണങ്ങിയത് ഇഷ്ടം കൊണ്ടാണെന്നും 

കരഞ്ഞത് സന്തോഷം കൊണ്ടാണെന്നും

മടുത്തുപോയത് നിറവാണെന്നും

പേടിച്ചത് കിനാവിലാണെന്നും 

അയാളറിഞ്ഞില്ല 

ശബ്ദമില്ലാത്ത കാഴ്ചകളിൽ നേരു പാതിയെ പതിഞ്ഞുള്ളൂ

വിശദീകരണം

 നിന്നെ തേടാത്തത് 

നീ എന്നിലുണ്ടെന്ന അറിവിനാലാണ്

നിന്നോട് മിണ്ടാത്തത്

നീ എന്നെയും ഞാൻ നിന്നെയും

അറിയുന്നതിനാലാണ്

അത്തരം ഒരു പ്രണയം

അസാദ്ധ്യമായിരിക്കാം 

എങ്കിലും ആ തേടൽ

അർത്ഥവത്താണ്

ഉച്ചി

ഉറവ് തേടി പോയി

ഉയിര് ചോദ്യമായി

ഉത്തരം കിട്ടിയില്ല 

ഉലച്ചിൽ ബാക്കിയായി

വെളിപാട്

മുറിയുമെന്ന ഭയത്താൽ

മുനയുള്ളതെടുക്കുന്നില്ല

ഉത്തരത്തെ ഭയന്ന്

ചോദിക്കുന്നില്ല

ആകാശത്തെ ഭയന്ന്

ചിറകൊളിപ്പിക്കുന്നു

ധൈര്യം ദൃശ്യമാവാതിരിക്കാൻ

ഭയത്തെ പുതക്കുന്നു

എന്നിട്ടും നീ എന്നെ കണ്ടെത്തുന്നു

ഞാൻ വീണ്ടും അതിനെ നിഷേധിക്കുന്നു..